Қарағандылық полицейлер арнайы техникалардың қысқа дайындығын тексерді, - деп хабарлайды Polisia.kz.
Қарағанды облыстық полиция департаменті, қалалық полиция басқармасының қызметкерлері жергілікті атқарушы билік өкілдері және төтенше жағдайлар департаментінің қызметкерлерімен бірлесіп, қысқы кезеңде автомобиль жолдарын күтіп ұстауға жол және коммуналдық ұйымдарының дайындығын тексеріп, арнайы техникалардың жай-күйімен танысты.
Шара барысында тәртіп сақшылары материалдық-техникалық базаның жай-күйіне, жол техникасының болуы мен олардың жинақталуының жай-күйіне, сонымен қатар көктайғаққа қарсы материалдардың болуына баса назар аударды.
- Айта кету керек, Қарағанды қалалық полиция басқармасы әкімшілік полиция бөлімінің қызметкерлері үнемі атқарушы билік өкілдерімен бірлесіп, көше-жол желісіне тексеру жүргізіп, қаланың автожолдарын күтіп ұстаудағы кемшіліктер бойынша мердігер ұйымдарға ұйғарымдар беретіні белгілі. Жыл басынан бастап осындай 85 тексеру жұмысы жүргізілді. Тексеру қорытындылары бойынша уәкілетті органдармен мердігер ұйымдарға 260 ұйғарым беріліп, автожолдарды ұстау қағидаларын бұзғаны үшін 77 хаттама толтырылды, - деді Қарағанды қалалық полиция басқармасы әкімшілік полиция бөлімінің бастығы Маурат Уахитов.
Шара барысында тәртіп сақшылары алдағы қыс мезгілінің жақындап келе жатқанына байланысты көлік жүргізушілерден көліктерінің дөңгелектерін қысқы дөңгелекке ауыстырып, жол жүру ережелерін қатаң сақтауға шақырды.
