Қызылордада 27 сотталған мектепке қабылданды, – деп хабарлайды Polisia.kz
Абақтының ар жағында отырып, темір торға тоғытылған жандар ҚАЖ мекемелерінде орта және кәсіптік білім алып, мамандық игеруде. Қазақстан Республикасы ІІМ-нің 2014 жылғы 18 тамыздағы №516 бұйрығында сотталғандарға негізгі орта, бастауыш, жалпы орта білім, техникалық және кәсіби білім алу туралы көрсетілген. Оның ішінде 30 жасқа дейінгі сотталған азаматтар орта білім алуға міндетті деп көрсетілген. Жаңа оқу жылында облыстағы түзеу мекемелерінде жазасын өтеп жүрген 27 сотталған білім алуға кешкі мектепке қабылданды. Олар аяқталмай қалған орта білімін жалғастыратын болады.
Сотталғанның бірі 8-сыныпқа қабылданса, енді бірі 9-10-11-сыныпқа қабылданды.
Қызылорда облысы бойынша ҚАЖ департаментінің № 37 мекемесінде (ЗК-169/4 мекемесі) жазасын өтеп жүрген орта білімі жоқ 14 сотталған, ал №60 мекемеде (ЗК-169/5 мекемесі) 13 сотталған бекітілген сабақ кестесіне сәйкес, арнайы кабинетте кешкі мектеп мұғалімдерінен білім алатын болады.
Бұл азаматтарға Қызылорда қалалық білім бөлімінің «Қызылорда қаласының жалпы білім беретін кешкі мектебі» коммуналдық мемлекеттік мекемесі мен Шиелі аудандық жалпы орта білім беретін кешкі мектеп КММ-нің мұғалімдері сабақ береді.
