Қызылорда облысында ауыл шаруашылығы мекемесінен құрал-сайман ұрлаған ауыл тұрғындары ұсталды, – деп хабарлайды Polisia.kz.
3 ақпан күні сағат 18:30 шамасында Қызылорда облысы ПД патрульдік полиция ротасының қызметкерлері “Шымкент-Самара” тас жолында Шиелі ауданы Бала би ауылының тұсында “Газель” автокөлігін тоқтатқан.
Тексеру барысында автокөлік салонына аудандағы ауыл шаруашылық өндірістік кооперативінен ұрланған темір құрал-саймандар тиелгені анықталды. Көлік жүргізуші мен оның екі серігі аудандық полиция бөліміне жеткізілді. Олардың үшеуі де 20 жастағы аудан тұрғындары болып шықты.
Аталған дерек бойынша Қазақстан Республикасы Қылмыстық кодексінің 188-бабының 1-бөлігімен (Ұрлық) сотқа дейінгі тергеп-тексеру амалдары жүргізілуде. Оқиғаның мән-жайы анықталуда.
