Қызылорда облысы Полиция департаментінде Балаларды қорғау күніне орай мерекелік іс-шара өткізілді, – деп хабарлайды Polisia.kz.
Қызылорда облысының Полиция департаментінде Балаларды қорғау күніне орай және Қазақстан Полициясының 30 жылдығын мерекелеу шеңберінде арнайы ұйымдастырылған мерекелік іс-шарасы өткізілді. Мерекелік бағдарламаның салтанатты ашылу рәсімінде Қызылорда облысы Полиция департаменті бастығының орынбасары Әміржан Өтегенов кішкентай балалардың құқығын қорғап, оларға қамқор болуға үндейтін мейрам қарсаңында ұйымдастырылған іс-шараның маңызын атап өтіп, ата-аналар мен балаларды құттықтап, жылы лебіздерін жеткізді.
Жаздың алғашқы күнімен тұспа-тұс келген бұл іс-шараға 70-тен аса бүлдіршін қатысты. Аталмыш іс-шара, Қызылорда облысы Полиция департаментінің мұражайын тамашалаудан басталды. Балалар мұражайда департаменттің тарихымен танысты. Оған қоса Жедел басқару орталығы мен жылдам қимылдайтын арнайы жасақ қызметкерлерінің арнайы құралдарымен, техникаларымен жақынырақ танысты. Сонымен қатар, кинология қызметі орталығының иттерінің шабуылдау әдістерін қызыға тамашалады.
Мереке барысында балалар полиция қызметкерлерімен әңгімелесіп, қызықтырған сұрақтарына жауап алды. Естелікке суретке, видеоға түсті. Іс-шара соңында барлық балаларға тәтті сусындар мен балмұздақ берілді. Өткізілген іс-шара балалардың естерінде ұзақ қалатыны сөзсіз. Игі шара алдағы уақытта тағы да жалғасын табады.
