Қызылордада мас күйде көлік айдап, түзеу мекемесіне қамалған сотталғандар өкініштерін айтты, – деп хабарлайды Polisia.kz.
Қызылорда облысы бойынша ҚАЖ департаментінің қауіпсіздігі барынша төмен мекемесінде абайсызда қылмыс жасаған азаматтар жазасын өтейді. Мекеме бастығының орынбасары Қанат Дайрабаевтың айтуынша, Қазақстан Республикасы ҚК-нің 346-бабының 1-бөлігімен (Көлік құралдарын басқару құқығынан айырылған және алкогольдік масаң күйдегі адамның көлік құралын басқаруы) бойынша 30-ға жуық азамат жазасын өтейді. Сол сотталғандардың бірі Нұрлыбек мекемеге сәуір айында келіпті. Өзінің айтуынша, екі жыл бұрын көлік басқару құқығынан жеті жылға айырылған. Соған қарамастан досының туған күнінен шыққан ол көлікті құжатсыз, масаң күйде жүргізген.
– Полиция қызметкерлері көлігімді тоқтатып, масаң күйде екенімді байқап, масаңдық дәрежесін тексеру үшін наркология орталығына апарды. Медициналық куәландыру алкогольді орташа масаң күйде болғанымды көрсетті. Сот үкімімен өмір бақи көлік жүргізу құқығынан айырылып, алты айға бас бостандығынан айырылдым. Заңды белшесінен басып, жүргізу құқығынан айырылсам да, масаң күйде көлікті басқарғаным өз қателегімнен. Ішімдіктің кесірінен өз тағдырыма өзім балта шауып, бостандықтың қадірін түсінбей, жолымнан адастым. Әсіресе, анама қиын болды. Телефонмен анаммен сөйлескен сайын кешірім сұраймын. Менің қателігімді басқа адам қайталамаса екен, масаң күйде көлік тізгінін басқару өз өміріңе де, басқа адамдардың өміріне де зиянын тигізеді. «Жаңылмайтын жақ, сүрінбейтін тұяқ жоқ» демекші, адам баласының шалыс басуы, қателесуі бір-ақ сәт екен. Жазамды өтеп шыққан соң отбасылы болсам деген арманым бар. Ата-анаңның, бауырларыңның қасында жүргенге ештеңе жетпейді екен, – деп әңгімесін аяқтады сотталған жігіт.
Нұрлыбектің қатарында Марат та бар. Ол да осы баппен сотталған. Ол да масаң күйде көлік жүргізген. Сот үкімімен алты айға сотталып, қазір жазасын өтеп жатыр.
– Ұлым мен қызым бар. Балаларым менің түзеу мекемесінде екенімді білмейді. Өйткені балаларыма қиын, естімесе екен деймін. Әсіресе, кішкентайым қайта-қайта сұрайды екен. Сотталғанға дейін Атырау қаласында теміржолда жұмыс істейтінмін. Балаларым жұмысқа кетті деп ойлап жүр. Күнделікті телефонмен сөйлесіп тұрамын. Мен оларды қатты сағындым, балаларым мені күтіп жүр. Темір тұлпар тізгіндеген азаматтарға ішімдік ішіп, көлік жүргізбеңіздер дер едім, – деді сотталған азамат.
– Мекемеге жаза мерзімін өтеуге келген әрбір азаматпен мекеме қызметкерлері тәрбие жұмыстарын жүргізіп, жұмыспен қамтиды. Тиісті шараларды қабылдайды. Әр сотталғанның мінез-құлқы мен жасаған қылмысына қарай жеке тәрбиелеу жұмыстары жүргізіледі, – дейді Қ. Дайрабаев.
