Шығыс Қазақстан облысында полиция жолда бұзылып қалған автобустың 46 жолаушысына көмек көрсетті, – деп хабарлайды Polisia.kz.
Шемонаиха ауданында Өскемен — Новосибирск бағытындағы King Long жолаушылары бар автобус техникалық ақауға тап болды. Оқиға уақытында автобуста кәмелетке толмаған балаларды қоса алғанда 46 жолаушы болған.
7 қаңтар күні сағат 01:00-де Шемонаиха аудандық полиция бөлімінің «102» арнасына белгісіз әйел адам хабарласып, Новосибирск бағытындағы автобустың бұзылып қалғанын және оның ішінде кәмелетке толмаған балаларды қоса алғанда 46 жолаушының суық ауа райында далада қалғанын жеткізді.
Полиция қызметкерлері дереу оқиға орнына жетіп, мәселені анықтау барысында генератордың істен шыққаны белгілі болды. Полицейлер жолаушылар мен жүргізушілерді дереу Шемонаиха колледжіне эвакуациялап, жылынып, демалуларына жағдай жасады.
Полиция қызметкерлерінің жедел әрі үйлесімді іс-әрекеттерінің арқасында автобустың техникалық ақауы жойылып, жолаушылар сапарын сәтті жалғастырды.
Жолаушылар мен жүргізушілер көрсетілген жедел көмек үшін полиция қызметкерлеріне алғыс білдірді.
