Түркістанда діни әдебиеттерді заңсыз сату дерегі анықталды. Дүкен сатушысынан 30 діни кітап тәркіленді, – деп хабарлайды Polisia.kz.
Түркістан облысы полиция департаментінің экстремизмге қарсы іс-қимыл басқармасының қызметкерлері Түркістан қаласының полиция басқармасымен бірлесіп, профилактикалық іс-шара өткізіп, кезекті заңсыздықтың жолын кесті.
Мәселен, полицейлер облыс орталығында орналасқан сауда орнының бірінде діни сипаттағы кітаптарды заңсыз сату жайтын анықтады. Тексеру кезінде дүкен сатушысының сату үшін тиісті рұқсаты жоқ екені белгілі болды. Тәртіп сақшылары одан 30-дан астам діни кітапты тәркілеп алып, сараптамаға жіберді.
Осы жайт бойынша ҚР ӘҚБтК-нің 490-бабы 3-тармағының 1-бөлігі (Қазақстан Республикасының діни қызмет және діни бірлестіктер туралы заңнамасын бұзу) бойынша әкімшілік хаттама толтырылды. Бүгінде оқиғаның толық мән-жайы анықталып жатыр.
