Түркістанда мас халде көлік басқарған жүргізуші 15 күнге қамалды, – деп хабарлайды Polisia.kz.
Сарыағаш ауданы ПБ-ның полиция қызметкерлері кешкі уақытта жол ережелерін бұзып келе жатқан Lada-210741 автокөлігін байқап, тоқтатты. Оны тексеру кезінде полицейлер жүргізушінің мас күйіне күдіктеніп, медициналық сараптама тағайындады. Сараптама қорытындысы бойынша жүргізушінің мас екені анықталды.
Полиция қызметкерлері аталған жайтты ӘҚБтК 608-бабы (Жүргізушінің көлік құралын алкогольдік, есірткілік және (немесе) уытқұмарлық масаң күйде басқаруы, сол сияқты көлік құралын алкогольдік, есірткілік және (немесе) уытқұмарлық масаң күйдегі адамның басқаруына беру) бойынша тіркеді. Осылайша полиция қызметкерлері аталған жайттарға байланысты іс-құжаттарды жинақтап, заңды шешім қабылдау мақсатында Сарыағаш аудандық сотына жолдады.
Сот жүргізушіні ӘҚБтК 608-бабына сәйкес кінәлі деп танып, көлік иесін 7 жылға автокөлік басқару құқығынан айырып, 15 тәулікке әкімшілік қамауға алуға үкім етті.
