Түркістанда жас жігіт әкесінің атынан жасырын онлайн несие рәсімдеп алған, – деп хабарлайды Polisia.kz
Түркістан ҚПБ-ға жергілікті тұрғын арызданды. Жәбірленуші ер азаматтың айтуынша, оның атынан белгісіз біреу ақшалай онлайн несие алып, бір миллион теңгеге жуық шығын келтірген. Бұл туралы жәбірленуші арада бір айдай уақыт өткен соң, яғни банктен несиеңізді төлеңіз деп хабар келгенде ғана білген. Содан жәбірленуші тез арада тәртіп сақшыларынан мән-жайды анықтауға көмек берулерін сұрайды.
Аталған жайт ҚР ҚК-нің 190-бабы (Алаяқтық) бойынша тіркелді.
Түркістандық полицейлер арызданушының шағымына сәйкес, орын алған алаяқтық қылмысын ашып, күдіктіні анықтау мақсатында қажетті іс-шараларды жүргізді. Тексеру жұмыстары кезінде полицейлер осы қылмысқа қатысы бар күдіктінің жеке басын анықтады. Ол жәбірленушінің ұлы болып шықты.
Белгілі болғандай, ұлы қоңырау соғу үшін әкесінің телефонын сұрап алып, сол сәтте банк қосымшасымен несие рәсімдеген. Сондықтан Түркістан полицейлері азаматтарға әрқашан сақ болуға кеңес береді.
