Ұлттық домбыра күніне орай полиция қызметкерлері Медеу мұз айдынында күй шертті, — деп хабарлайды Polisia.kz.
Ұлттық домбыра күніне орай және Қазақстан полициясының 33 жылдығына арналған имидждік-идеологиялық науқан аясында Алматы қалалық полиция департаментінің қызметкерлері оңтүстік астананың символдарының бірі – Медеу мұз айдынында бірегей патриоттық іс-шара өткізді.
ІІМ М.Есболатов атындағы академиясының курсанттары мен 80 полиция қызметкері “Балбырауын” күйін орындап, қайсарлық, бірлік пен қызметке адалдық танытты.
Іс-шара Отанға қызмет ету тек тәртіпті сақтау ғана емес, сонымен қатар ұлттық құндылықтарды, салт-дәстүрлерді, мәдени мұраларды құрметтеу екенін еске салды.
— Ұлттық домбыра – мейірімділік қана емес, тарихқа, мәдениетке, осы жер бетінде бірге өмір сүріп жатқан халыққа деген құрмет. Медеу секілді жерде оркестрлік орындау – Қазақстан полициясының ішкі қуатын, бірлігін және халықпен байланысын білдіреді. Біз жастардың өз елі мен өз полициясымен мақтанғанын қалаймыз, — дейді ұйымдастырушылар.
Ұйымдастырушылардың айтуынша, аты аңызға айналған Медеудің таңдалуы мәдениет пен патриотизмді біріктірген шараның ерекше атмосферасын көрсетеді.
