Ұлытау облысында «Автобус» ЖПІШ аясында 59 әкімшілік құқық бұзушылық анықталды, – деп хабарлайды Polisia.kz.
Ұлытау облысы аумағында «Автобус» республикалық жедел-профилактикалық іс-шарасы аясында бірқатар жұмыстар атқарылып жатыр. Шараның негізгі мақсаты – азаматтарды тасымалдайтын қоғамдық көліктердің жүргізушілері арасында заңдылықты және жол жүру ережелерін қатаң сақтау.
Полиция департаментінің жергілікті полиция қызметі және Әкімшілік полиция басқармасының қызметкерлері бүгін «Транко-Экспресс» ЖШС өкілдерімен кездесу өткізді. Автопарк ұжымымен кездесу аясында ЖПҚБ бастығының орынбасары Ерғали Қожабеков, Әкімшілік полиция басқармасының бастығының орынбасары Ернияз Алиев, бөлім бастығы Арман Әбілқасымов қатысып, «Автобус» жедел-профилактикалық іс-шарасы аясында үш күнде облыста 59 әкімшілік құқық бұзушылық анықталғанын атап өтті.
Тәртіп сақшылары іс-шараның басты назары қоғамдық көліктердің қауіпсіздігіне бағытталғанын айтты. Осыған байланысты жолаушыларды қауіпсіз тасымалдау шараларын күшейту қажет.
– Біздің міндетіміз өзара әрекеттесу және жол қозғалысы ережелерін бұзудың алдын алуға бағытталған. Ең бастысы, жолдар барлық қозғалыс қатысушылары үшін қауіпсіз болғаны жөн, – деді полицейлер.
«Автобус» жедел-профилактикалық іс-шарасы 11 желтоқсанға дейін жалғасады.
