Шымкент қаласы Әл-Фараби ауданының полицейлері қылмысты “ізін суытпай” ашты, – деп хабарлайды Polisia.kz.
Бүгін 10 сәуір күні сағат 10:00 шамасында «102» арнасы арқылы Әл-Фараби ауданы Полиция басқармасының кезекші бөліміне велосипед ұрлығына қатысты хабарлама түскен.
Арызданушы 1993 жылы туған азамат Есіл көшесі №3 үйдің подъезінде тұрған «Аdidsi 95» үлгідегі велосипедін ұрлап кеткенін айтып, тәртіп сақшыларынан көмек сұрған.
Ұрлықты ашуға бағытталған жедел іздестіру шаралары барысында Әл-Фараби ауданы Полиция басқармасы №26 учаскелік полиция пунктінің инспекторлары қылмысқа қатысы бар деген күдікпен ер азаматты ұстап, айғақты зат велосипед тәркіленіп алынды.
– Өте шұғыл қимылдап, қылмысты ашып, қолды болған затымды қайтарып берді. Қылмысты “ізін суытпай” ашқан полицейлерге алғыс айтамын, – деді велосипед егесі.
– Осындай қылмыстық әрекеттердің алдын алудың жолы – қос дөңгелекті көліктерді бейнебақылау камераларымен қамтылатын аумақтарға және құлыпқа салынып жабылатын орындарға қою керек, себебі ауа райының жылы кезінде велосипед ұрлықтарының орын алуы – кең тарайтын қылмыстың түрі, – дейді тәртіп сақшылары.
