Жамбыл облысында есірткі қылмысының алдын алу мәселелері бойынша профилактикалық кездесу өтті, - деп хабарлайды Polisia.kz.
Жамбыл облысының полиция департаменті есірткі қылмысына қарсы іс-қимыл басқармасының қызметкерлері Тараз қаласы әкімдігі ішкі саясат бөлімінің "Жастар ресурстық орталығы" КММ-мен бірлесіп, Қазақстан Республикасы Стратегиялық жоспарлау және реформалар агенттігі Ұлттық статистика бюросының Жамбыл облысы бойынша департаменті республикалық мемлекеттік мекемесінің ұжымымен профилактикалық кездесу өткізді.
Іс-шара есірткі қылмысына қарсы іс-қимылға бағытталған профилактикалық шаралар кешенін жүзеге асыру, халықтың құқықтық сауаттылығын арттыру және есірткіге қарсы тұрақты дүниетанымды қалыптастыру аясында ұйымдастырылды.
Кездесу барысында полиция қызметкерлері азаматтарды есірткінің заңсыз айналымына тартудың қазіргі заманғы тәсілдері туралы айтып, есірткіге қатысты құқық бұзушылықтардың алдын алу шараларын түсіндірді. Сонымен қатар Қазақстан Республикасының заңнамасына сәйкес есірткі құралдары мен психотроптық заттардың заңсыз айналымына байланысты қылмыстар үшін көзделген қылмыстық және әкімшілік жауапкершілік жөнінде еске салды.
Қатысушыларға есірткіге қарсы бағыттағы бейнероликтер көрсетіліп, онда тыйым салынған заттарды қолдану мен таратудың салдары, сондай-ақ қаскөйлердің азаматтарды, әсіресе жастарды, қылмыстық әрекетке тарту тәсілдері көрнекі түрде баяндалды.
Кездесуде есірткіден азат қоғам қалыптастырудағы әрбір азаматтың рөліне ерекше назар аударылды. Қатысушылар азаматтық жауапкершілік танытуға, тыйым салынған заттардың таралу фактілері туралы құқық қорғау органдарына дер кезінде хабарлауға және есірткі қылмысы мәселесіне бейжай қарамауға шақырды.
Мұндай профилактикалық іс-шараларды өткізу халықтың құқықтық мәдениетін арттыруға, мемлекеттік органдар мен қоғам арасындағы өзара іс-қимылды нығайтуға, сондай-ақ есірткіні елдің денсаулығына, қауіпсіздігіне және болашағына төнетін ең күрделі қатерлердің бірі ретінде қоғамның тұрақты түрде қабылдамау көзқарасын қалыптастыруға ықпал етеді.
