Жамбылдық полицейлер ірі ұрлық дерегін ашты, – деп хабарлайды Polisia.kz.
Жамбыл ауданының полиция бөліміне бір ЖШС директоры жүгінді. Ол 13 сәуірде белгісіз тұлғалардың зауыт аумағынан жалпы құны 2,7 млн теңгеге жуық 100 шаршы метр конвейер таспасын ұрлағаны туралы шағымданды.
Жедел-іздестіру іс-шараларын жүргізу кезінде Жамбыл ауданының криминалдық полиция бөлімшесінің қызметкерлері осы кәсіпорында жұмыс істейтін екі күдіктіні анықтап, ұстады. Олар Тараз қаласының 26 және 30 жастағы тұрғындары болып шықты. Ұсталғандар кінәларын толық мойындады.
Аталған дерекке қатысты Қазақстан Республикасы Қылмыстық кодексінің 188-бабы 3-бөлігі бойынша сотқа дейінгі тергеу амалдары басталды.
Тергеу барысында полицейлер күдіктілердің ұрланған таспаны 900 мың теңгеге сатқанын, ал ақшаны жеке қажеттіліктеріне жұмсағанын анықтады.
Аталған қылмысты жасағаны үшін Қазақстан Республикасының Қылмыстық кодексінде мүлкі тәркіленіп, екі жылдан жеті жылға дейінгі мерзімге бас бостандығын шектеу не сол мерзімге бас бостандығынан айыру түріндегі жаза көзделген.
