Жетісайда дәнекерлеуге қажетті мыңға жуық электродты ұрлаған екі жігіт ұсталды, – деп хабарлайды Polisia.kz.
Жетісай аудандық полиция бөліміне жергілікті тұрғын арызданып, өндірістік үй-жайындағы қоймасына ұры түскенін жеткізді. Яғни, белгісіз біреулер жәбірленушіге тиесілі контейнердің құлпын бұзып, онда тұрған Kobelco LB-52 әрқайсысының ішінде шамамен 100 данадан электроды бар 9 қорабын, бір Alteco болгаркасын ұрлап кеткені көрсетілген. Келтірілген шығын көлемі 400 мың теңгені құрайды.
Аталған жайт ҚР ҚК-нің 188-бабы (Ұрлық) бойынша тіркелді.
Жедел уәкілдер бірнеше күн қатарынан жан-жақты іздестіру шараларын жүргізді. Көрген-білгендерден жауап алып, жақын аумақтарды қарап шықты. Нәтижесінде күдікті ретінде жетісайлық екі жас жігіт анықталды, олардың бірі бұрын осы мекемеде жұмыс жасаған. Сезіктілер оқиғаның мән-жайын анықтау үшін полицияға жеткізілді.
Белгілі болғандай, күдікті екеу оңай жолмен пайда табуды көздеген. Содан қарауылдың тамақтануға кеткен сәтін пайдаланып, ұрлыққа түскен. Бөтеннің мүлкін жасырып, сатып жібермекші болған. Алайда полиция қызметкерлерінің қырағылы, жылдам әрекет етуінің арқасында ойларын іске асыра алмай, дер кезінде ұсталды. Қазіргі таңда іс бойынша сотқа дейінгі тергеу амалдары жүргізіліп жатыр.
