Павлодарда жұмыстан шығып, үйіне оралмаған ер адам Нұр-Сұлтаннан табылды, – деп хабарлайды Polisia.kz.
Іздестіру іс-шаралары барысында Павлодар облысында жыл басынан бері хабар-ошарсыз кеткен 18 азаматтың мекенжайы анықталды. Сонымен қатар, биыл екі кәмелетке толмағанға іздеу жарияланды, олар іздестіріліп, заңды өкілдеріне қайтарылды.
Осы жылы тұрғындардан азаматтардың хабар-ошарсыз жоғалып кетуі туралы 56 өтініш келіп түсті, оның ішінде жоғалған 39 адам іздестіру жариялаусыз кезекші тәулікте іздестіріліп табылды.
– Іздестіру іс-шараларын жүргізу кезінде хабар-ошарсыз жоғалған 35 жастағы павлодарлықтың мекенжайы анықталды. Ол 26 ақпанда Толстой көшесі бойынша жұмыс орнынан кетіп, үйіне оралмаған. Жедел уәкілдер ер адамның бірге тұратын әйелімен жанжалдасқаннан кейін Нұр-Сұлтан қаласына жұмысқа кеткенін анықтады, – деп хабарлады Павлодар облысы Полиция департаментінің баспасөз қызметі.
Басқа жағдайда павлодарлық жедел уәкілдер Алматы қалалық ПД қызметкерлерімен бірлесіп Алматыда жалға берілетін пәтерлердің бірінде Павлодар облысының 33 жастағы тұрғынын іздестіріп тапты, ол 6 ақпанда ауылдағы тұратын үйінен шығып кетіп, оралмады. Әйелі полицияға жүгінді.
Анықталғандай, павлодарлық туыстарына Алматы қаласына жұмысқа барғаны туралы хабарламаған, телефон нөмірін өзгерткен.
