Ақтөбе облысында есептегі сотталған спорттық сайыста жеңіске жетті, – деп хабарлайды Polisia.kz.
Ақтөбе облысы бойынша ҚАЖ департаментіне қарасты Ырғыз аудандық пробация қызметінің есебінде тұрған С. есімді сотталған биылғы жылдың 23 мамырында облыстық президенттік көпсайыс жарысына іріктеу мақсатында өткізілген аудандық кезеңінде 1-орынды жеңіп алды. Сотталған бұған дейін де, яғни 2023 жылдың 28 сәуірінде Ырғыз селосында өткен Қайыржан Қалтаевты еске алуға арналған волейбол турнирінде «Ырғыз» мектептен тыс аула клубының сапында өнер көрсетіп, жүлделі 3-орынды иеленген. Ал 2022 жылдың 29 қазаны күні Құйлыс ауылында өткен волейболдан аудандық ашық турнирде «Ырғыз» мектептен тыс аула клубының құрамында ойнап, 1-орынды жеңіп алған болатын.
– Жоспарға сай пробация қызметінің есебінде тұрған сотталғандарды түрлі іс-шараларға, соның ішінде спорттық шараларға қатыстырамыз. Ондағы мақсат – есептегі сотталғандарды қоғамға бейімдеу, қайта қылмыстың алдын алу, – дейді Ырғыз аудандық пробация қызметі тобының инспекторы Бақдаулет Байдилдин.
Айта кету керек, бұл сотталған азамат Ырғыз аудандық пробация қызметкерлерінің ықпалымен, «Ырғыз» мектептен тыс аула клубына жұмысшы ретінде орналастырылған.
