30 жылға жуық халықаралық іздеуде жүрген ресейлік ШҚО-да ұсталды, – деп хабарлайды Polisia.kz.
Ағымдағы жылдың 25 қыркүйек 1 қазан аралығында Шығыс Қазақстан облысының аумағында «Іздеу» республикалық жедел-алдын алу іс-шарасы өткізілуде.
Аталған жедел алдын алу шарасын жүргізу барысында Семей қаласындағы криминалдық полиция қызметкерлері 30 жылға жуық Ресей Федерациясының құқық қорғау органдарынан жасырынып келген сол елдің азаматын ұстады. Іздеуде болған азамат 1992 жылдың ақпанынан бастап адам өліміне әкеп соққан дене жарақатын салумен байланысты аса ауыр қылмыс жасағаны үшін мемлекетаралық іздеуде болған.
Тәртіп сақшыларына келіп түскен жедел ақпараттың нәтижесінде, жылдар бойы жасырынып келген адамды анықтаған. Ол қаншама жылдар бойы бірге тұрған әйелге өзін жалған атпен таныстырып, шынайы деректерін жасырып келген.
ПД бастығының орынбасары Талғат Шаяхметов атап өткендей:
– Қазіргі уақытта аталған қылмыстық қылмыскерді Ресей Федерациясына экстрадициялау туралы мәселе шешілуде.
