“Банк қызметкері” ақтөбелік әйелдің шотынан 780 мың теңге ақшаны жымқырған, – деп хабарлайды Polisia.kz.
Ағымдағы жылдың 3 желтоқсанында 34 жастағы әйелдің ұялы телефонына қоңырау келіп түсті. Қоңырау шалушы өзін банк қызметкері ретінде таныстырған.
Банктің жалған қызметкері әйел адамның сеніміне кіріп, оның шотынан алдау жолымен 780 мың теңге ақшаны жымқырған.
Алданған әйел полицияға жүгінді.
Полиция қызметкерлері күдікті адамды анықтауға және ұстауға бағытталған жедел іс-шаралар жүргізуде.
Аталған факті негізінде ҚР ҚК 190-бабы 2-бөлімі (Алаяқтық) бойынша сотқа дейінгі тергеу басталды. Осы баптың санкциясы мүлкі тәркіленіп, белгілі бір лауазымдарды атқару немесе белгілі бір қызметпен айналысу құқығынан үш жылға дейінгі мерзімге айыра отырып немесе онсыз, төрт мың айлық есептік көрсеткішке дейінгі мөлшерде айыппұл салуды не сол мөлшерде түзеу жұмыстарын не бір мың сағатқа дейінгі мерзімге қоғамдық жұмыстарға тартуды не төрт жылға дейінгі мерзімге бас бостандығын шектеуді не сол мерзімге бас бостандығынан айыруды көздейді.
Осындай жағдайлардың жиілеп кетуіне байланысты Ақтөбе облысының Полиция департаменті Сіздің дербес деректеріңізді, карта деректемелерін, Интернет-банктегі жеке кабинетіңіздің логин немесе паролін телефон арқылы үшінші адамдарға айтпаңыз; SMS-хабарламада көрсетілген сілтемеге баспаңыз; Банкинг қызметтеріне қол жеткізу құпия сөздерін үнемі өзгертіп отырыңыз, төлем жүйелерінде бар қауіпсіздік шараларын қолданыңыз.
