Павлодар облысында жыл басынан бері түнгі уақытта көшеде жүрген жасөспірімдердің 1029 ата-анасы жауапқа тартылды, – деп хабарлайды Polisia.kz
Жыл басынан бері Павлодар облысында полицейлер ата-аналарының балаларды тәрбиелеу, білім беру және олардың құқықтарын қорғау жөніндегі міндеттерін орындамағаны үшін 200-ге жуық заңды өкілін жауапқа тартты.
– Мысалы, 1 маусым күні сағат 23:30 шамасында әйел Павлодар қаласының Академик Шөкин көшесіндегі аулада жасөспірімдер өздерін қоғамдық жерде дұрыс ұстамағаны туралы полицияға хабарлады. Оқиға орнына келген полицейлер жасөспірімдерді полиция бөліміне жеткізіп, ата-аналарын шақырды. Нәтижесінде, балаларының түнгі демалысы үшін ата-аналары ҚР ӘҚБтК-нің 442-бабының 2-бөлігі бойынша жауапқа тартылды. Профилактикалық әңгімелер балалармен де, олардың ата-аналарымен де жүргізілді, – деді Павлодар облысы ПД баспасөз қызметі.
Айта кету керек, 2022 жылдың 5 айында балалардың түнгі уақытта ойын-сауық мекемелерінде және тұрғын үйден тыс жерде заңды өкілдерінің еріп жүруінсіз болғаны үшін 1029 ата-ана жазаға тартылды. Сондай-ақ, ойын-сауық мекемелерінің 25 иесі жасөспірімдердің ересектерсіз кеш уақытта болуына жол бергені үшін жауапкершілікке тартылды.
Тәртіп сақшылары азаматтарды мұқият болуға және кәмелетке толмаған балаларды қараусыз қалдырмауға шақырады. Себебі әр ата-ана өз баласының өмірі мен денсаулығына жауап береді.
