Алматы облысы және Жетісу облысы бойынша ҚАЖ департаментінде қызметкерлер салтанатты түрде марапатталды, – деп хабарлайды Polisia.kz.
Қазақстан Республикасының Конституция күнін мерекелеуге орай Алматы облысы және Жетісу облысы бойынша ҚАЖ департаменті Сүйінбай атындағы облыстық филармония ғимаратында салтанатты іс-шара өткізді.
Іс-шара Қазақстан Республикасының Мемлекеттік Әнұранын орындаудан басталды. ҚАЖ департаментінің бастығы Игілік Хасенов жиналғандарды мерекемен құттықтап, ерекше көзге түскен қызметкерлерді медальдармен, грамоталармен және алғыс хаттармен марапаттады.
Салтанатты рәсімге департаменттің жеке құрамы, ведомстволық бағынысты мекемелердің және пробация қызметінің қызметкерлері қатысты. Сондай-ақ, іс-шараға ҚАЖ ардагерлері, прокуратура өкілдері және 3660 және 5514 әскери бөлімдерінің басшылары шақырылды.
«Биыл мемлекетіміздің іргетасын қалаған Конституция қабылданғанына 27 жыл толды. Конституция – тәуелсіздіктің, бірлік пен тұрақтылықтың кепілі», – деп атап өтті ҚАЖД бастығы Игілік Хасенов.
Мерекелік шара Сүйінбай атындағы облыстық филармония солистерінің қатысуымен салтанатты концерттік бағдарламамен жалғасты.
