Шымкентте үйінің ауласында сора өсімдігін өсірген 56 жастағы жергілікті тұрғын сотталды, – деп хабарлайды Polisia.kz.
Шымкент қаласының Қаратау аудандық сотында 56 жастағы жергілікті тұрғынға қатысты қылмыстық іс қаралды. Ол ірі мөлшерде өсiруге тыйым салынған өсiмдiктердi егіп-өсіргені үшін айыпталған болатын.
Белгілі болғандай, аталған азамат үйінің ауласындағы шаруашылық қорасының ішінде заңмен тыйым салынған және қоғамға қауіп келтіретінін, халық денсаулығына қарсы қылмыстар қатарына жататындығын біле тұра, өсіруге тыйым салынған сора өсімдіктерінің ұрықтарын заңсыз егіп-өсіріп, оны суғарып, күтіп, баптаған.
2022 жылғы шілде айында әкімшілік аумақты тексеру келген полиция қызметкерлері оның заңсыз әрекеттерін анықтап, үйінің ауласынан 636 түп сора өсімдігін тәркілеп алған. Басты сот талқылауында айыпталушы өзінің кінәсін толық мойындап, жасаған іс-әрекетіне шын жүректен өкінетінін, асырауында 80 жастағы қарт анасының барын және өзінің денсаулығының нашар екендігін айтқан.
Сот оның қылмыстық жауаптылығы мен жазасын жеңілдететін мән-жайлардың болуын ескеріп, Қазақстан Республикасы Қылмыстық кодексінің 300-бабының 2-бөлігінде көрсетілген қылмыстық құқық бұзушылықты жасағаны үшін кінәлі деп танып, оған осы баппен 3 жыл 6 ай мерзімге бас бостандығынан айыру жазасын тағайындады. Сот үкімімен сотталушының жазасын қылмыстық-атқару жүйесінің орташа қауіпсіз мекемелерінде өтеу белгіленді.
