Қызылорда облыстық ҚАЖД-ға қарасты №60 мекеменің мәжіліс залында жазасын өтеуші азаматтарға сапалы медициналық көмек көрсету мақсатында жиналыс өтті, – деп хабарлайды Polisia.kz.
Жиналысқа №3 қалалық емхананың бас дәрігерінің міндетін атқарушы Жаннат Қожарипова, ҚАЖ департаметі бастығының орынбасары Жүніс Әбдіқайыров, №60 мекеме бастығы Мақсұт Өтетлеуов, мекемеде қызмет атқаратын медицина мамандары қатысты.
– Біздің мақсатымыз – сотталғандардың денсаулық жағдайын, олардың жай-күйін бақылап, сапалы медициналық көмек көрсетіп, түзелу жолына түскен жазасын өтеуші азаматтардың біздің қоғамымызға оралуына жағдай жасау, – деді Жаннат Қожарипова.
Жиналыс барысында ҚАЖД №60 мекемесінің бастығы сотталғандардың денсаулық жағдайына шолу жасап, алдағы уақытта жұмыс сапасын арттыру жайлы сөз қозғады.
– ҚАЖД №60 мекемесімен тығыз байланыста қызмет етіп келе жатқан Қызылорда қалалық №3 емханасының дәрігерлеріне алғыс айтамыз. Сотталғандардың денсаулығына қажеттілікті мекеме тарапынан талап ету – жазасын өтеуші азаматтардың ажырамас құқығы болғандықтан, мекемедегі медицина қызметкерлері жазасын өтеуші азаматтардың денсаулық жағдайын басты назарда ұстап, барлық медициналық шараларын жасауда, – Мақсұт Өтетлеуов.
Жиын соңында ҚАЖ департаменті бастығының орынбасары Жүніс Әбдіқайыров №60 мекеменің медициналық бөлімінің жұмысы, медициналық ұжымның жұмысқа қабілеттілігі туралы оң пікір білдірді.
