СҚО-да жүргізуші жылқыны қағып кетті, – деп хабарлайды Polisia.kz.
Тайынша ауданында түнгі уақытта Lada Granta автокөлігі жылқыны соғып кетті. Оқиға Көкшетау – Омбы автожолының 50-шақырымында сағат 03:30 шамасында болған. Көлікті жүргізген Ақжар ауданының 58 жастағы тұрғынының айтуынша, Аймақ ауылынан 5 шақырым жерде жол үстіне кенеттен бір табын жылқы шыға келген. Ер адам көлікті тоқтатуға тырысқанымен, жылқыны соғып кетті. Көлікке механикалық зақым келген. Жүргізуші зардап шеккен жоқ, ал аман қалған жылқы орнынан тұрып, ары қарай шауып кетті.
– Аудандық полиция бөлімінің қызметкерлері бақташыны немесе табын иесін анықтап жатыр. Ол ҚР Әкімшілік құқық бұзушылық туралы Кодексінің 408-бабының 2-бөлігі бойынша жауапкершілікке тартылатын болады. Мал жаю қағидаларын бұзу жол-көлік оқиғаларына алып келуі мүмкін екенін естен шығармаған жөн, – дейді аудандық ПБ бастығы Нұрлыжан Ақтанов.
СҚО ПД әкімшілік полиция басқармасы ұсынған мәліметке сәйкес, тәртіп сақшылары 11 айда ҚР ӘҚБтК-нің 408-бабы бойынша 3440-тан астам хаттама толтырған. Сондай-ақ тәртіп сақшылары Солтүстік Қазақстан облысының автожолдарында еліктердің көбеюіне байланысты жүргізушілерді сақ болуға шақырады.
Жаңа жыл мерекесі қарсаңында СҚО ПД жергілікті полиция қызметінің қызметкерлері 21 желтоқсанна бастап “Қауіпсіз жол” жедел-профилактикалық іс-шарасын өткізіп жатыр. Іс-шараның мақсаты – жол-көлік оқиғаларының алдын алу және жүргізушілер арасындағы тәртіпті нығайту. Бұдан бөлек, іс-шара шеңберінде жолдарда апаттылыққа тікелей әсер ететін бұзушылықтарды анықтауға бағытталған тексерулер жүргізіліп жатыр.
