Көлік полицейлері теміржол бойында малды қараусыз жаю дерегін анықтады, – деп хабарлайды Polisia.kz.
Арыс станциясындағы көліктегі полиция бөлімінің қызметкерлері теміржолға жақын аумақта ауыл шаруашылығы жануарларын қараусыз жаю фактісін анықтады.
Профилактикалық іс-шаралар барысында көлік полицейлері 13 жылқының теміржол үстінде жүргенін анықтады. Бұл жағдай пойыз қозғалысының қауіпсіздігіне тікелей қауіп төндірген.
Жедел қабылданған шаралар нәтижесінде жануарлардың иесі белгілі болды. Ол 34 жастағы қала тұрғыны болып шықты. Жылқылар дереу арнайы қораға қамалды. Аталған құқық бұзушылық үшін жылқылардың иесі жауапкершілікке тартылды.
– Теміржол инфрақұрылымына жақын жерде малды қараусыз жаю пойыз қозғалысының қауіпсіздігіне, сондай-ақ азаматтардың өмірі мен денсаулығына елеулі қауіп төндіретінін ескертеміз. Мал иелеріне жануарларды күтіп-бағу және жаю қағидаларын қатаң сақтап, олардың теміржолдарына шығып кетуіне жол бермеу үшін барлық қажетті шараларды қабылдау қажет, - дейді көлік полицейлері.
