Жетісу облысы ПД шағын футболдан турнир өткізді, – деп хабарлайды Polisia.kz.
“Отан қорғаушылар күнін” мерекелеу қарсанында Жетісу облысының полиция департаменті дербес бөлімшелер арасында шағын футболдан турнир өткізді. Турнирге департаменттен 8 команда қатысты. Іс-шараның мақсаты – жеке құрам арасында спортпен шұғылдану үшін салауатты өмір салтын насихаттау.
– Мемлекет басшысы қоғамда салауатты өмір салтын қалыптастыруды, азаматтарды белсенді дене шынықтырумен және спортпен шұғылдануға тартуды Қазақстанды дамытудың басым бағыттарының бірі ретінде белгілегенін білесіздер. Ішкі істер органдарының қызметкерлері қоғамды сауықтыру бойынша орасан өзгерістердің куәгерлері ғана емес, сонымен қатар спорттық шаралардың белсенді қатысушылары, – деп атап өтті полиция департаменті бастығының орынбасары Мадияр Омаров.
– Турнир барысында қатысушылар жарыс рухына бөленді. Жарыс нәтижесінде ПД криминалдық полиция басқармасының командасы жеңіске жетіп, ауыспалы кубоктың иегері атанды. ІІ орынды әкімшілік полиция басқармасының командасы жеңіп алды. Тергеу және анықтау басқармаларының командасы тең дәрежеде күресіп, үшінші орынды иеленді, – деп атап өтті ПД Арнайы және жұмылдыру даярлығы басқармасы бастығының міндетін атқарушы Мұхит Бөлегенов.
Жарыстың барлық қатысушылары бағалы сыйлықтармен және кубокпен марапатталды.
