Павлодар ауданында пробация қызметі құқық бұзушылықтың алдын алу үшін ашық сот отырысын өткізді, – деп хабарлайды Polisia.kz.
Павлодар ауданының пробация қызметі жол қозғалысы ережелерін өрескел бұзып, мас күйінде көлік басқарған азаматтың ісі бойынша ашық сот отырысын ұйымдастырды. Бұл іс-шараның мақсаты – заң бұзушылықтың алдын алу және пробация есебінде тұрған адамдардың құқықтық санасын арттыру болды.
Сот отырысында сотталушының әрекеті азаматтардың өмірі мен денсаулығына тікелей қауіп төндіргені анықталды. 30 жастағы ер адам 2023 жылдың ақпан айында мас күйінде көлік жүргізгені үшін көлік құралын басқару құқығынан айырылған. Алайда 2024 жылдың қыркүйек айында ол кең далада өткен ат жарысына қатысып, шамамен екі литр сыра ішкен соң, мотоцикл рөліне отыруға бел буған. Оның бұл жауапсыз әрекеті қайғылы жағдаймен аяқталды: жол бойында бір адамды қағып, жарақаттады.
Сот отырысы барысында айыпталушы өз кінәсін толық мойындап, заңды бұзған әрекеті үшін өкінетінін жеткізді. Осыған қарамастан, оның әрекеті заң алдында жауапқа тартылуға әкеп соқты.
Іс-шара пробация қызметінің есебінде тұрған тұлғалармен профилактикалық жұмыс жүргізу аясында ұйымдастырылды. Сот процесіне арнайы шақырылған есепте тұрған азаматтар құқыққа немқұрайлы қараудың, өз міндеттерін елемеудің қандай салдарға әкелетінін көзбен көріп, үлкен сабақ алды.
Пробация қызметінің бастығы Дамир Жаныбеков мұндай іс-шаралардың құқықтық сананы қалыптастырып, азаматтарды заң бұзушылықтан сақтандыруда маңызы зор екенін атап өтті. Ол жауапты мінез-құлықтың қажеттілігін ұғындырудың және құқық бұзушылықтың жазасыз қалмайтынын көрсетудің тиімді жолы – осындай ашық сот процестері екенін айтты.
Ашық сот отырысы – заңды құрметтеудің, жауапты әрекет етудің және қоғам алдындағы міндеттерді орындаудың маңызын көрсететін маңызды ескерту болды.
