Екібастұз қаласының тұрғындары есірткіге қарсы күрестің жаңа қадамымен танысу мүмкіндігіне ие болды, – деп хабарлайды Polisia.kz.
Павлодар облысының полиция департаменті мен прокуратурасы ұйымдастырған жылжымалы «Есірткіге қарсы консультациялық пункт» өз жұмысын бастады.
Бұл бастаманың басты мақсаты – тұрғындарды, мектеп оқушыларын, колледждер мен жоғары оқу орындарының студенттерін есірткі және психотроптық заттардың заңсыз айналымының қауіптілігі туралы хабардар ету. Сонымен қатар нашақорлықтың алдын алу, тәуелді азаматтарды емдеу мен оңалту мәселелері бойынша құқықтық және медициналық кеңес беру де осы жобаның негізгі міндеттерінің қатарында.
Акция «Өнер» мәдениет сарайының алдында өтті, бұл күні мұнда жиналған халықтың қарасы қалың болды. Жоғары сынып оқушылары мен студенттер заңгерлерден, дәрігерлерден, наркологтардан, құқық қорғау органдарының өкілдерінен және қоғамдық ұйымдар мүшелерінен пайдалы ақпарат алды. Шара барысында азаматтар ЖҚТБ-ға (СПИД) анонимді тест тапсыру мүмкіндігіне ие болды.
Сонымен қатар қатысушылар режиссер Ринат Балғабаев түсірген «Қаптама» атты бейнероликті тамашалады. Бұл фильмнің басты мақсаты – есірткі тұтынудың жасырын қатерін көрсету және жастарды осы қасіреттен сақтандыру.
Нашақорлық – емделмейтін дерттің алдын алудың амалы бар. Полиция өкілдерінің айтуынша, есірткіге тәуелділік – адам ағзасы мен психикасын терең шырмап алатын қауіпті дерт. Тәуелділікке түскен жастар оның салдарын түсінуге үлгермей, өмірлерін күрделі қиындықтарға ұшыратуы мүмкін.
– Егер біз осы пункт арқылы бір ғана жас азаматқа көмек көрсетсек, онда бұл жобаның мақсаты орындалғаны деп білеміз. Мұндай бастамалар жастарға құқықтық және психологиялық көмек тұрғысынан үлкен қолдау болмақ, – деді полиция қызметкерлері.
Жобаны Павлодар облысының полиция департаменті мен прокуратурасы қолға алған. Оған облыстық мәслихат, «AMANAT» партиясының филиалы, Денсаулық сақтау және ақпарат және қоғамдық даму басқармасы, республикалық психикалық денсаулық ғылыми-практикалық орталығы және «New vision team» қоғамдық қоры қолдау көрсетті.
Бұл шара есірткіге қарсы күресте қоғам мен мемлекеттік органдардың бірлескен жұмысының жарқын мысалы бола алады. Бастама арқылы әрбір азаматқа салауатты өмір салтын ұстану маңыздылығы насихатталды.
