Павлодарда ювеналдық полиция қызметкерлері облыстағы кәмелетке толмаған балалардың қауіпсіздігін қамтамасыз ету мен олардың құқықтарын қорғауда маңызды рөл атқарады, – деп хабарлайды Polisia.kz.
Қызметкерлердің негізгі міндеті – жасөспірімдер арасындағы құқық бұзушылықтардың алдын алу, балалармен байланысты қылмыстарға қарсы күрес жүргізу, сондай-ақ балаларды түрлі қол сұғушылықтардан қорғау. Олар тек құқық бұзушылықтардың жолын кесіп қана қоймай, қиын жағдайға тап болған отбасылармен белсенді түрде жұмыс істеп, әңгімелер, дәрістер және жеке консультациялар ұйымдастырады.
Ювеналдық полиция қызметкерлерінің жұмысының маңызды бөлігі – білім беру мекемелерімен тығыз қарым-қатынас орнату. Полиция қызметкерлері үнемі оқушылармен кездесіп, оларға заңның негіздерін түсіндіріп, кездесетін қауіптер мен қиын жағдайлардан қалай сақтану қажеттігін айтады. Бұл іс-шаралар балалар мен полиция арасындағы сенім атмосферасын қалыптастыруға көмектеседі, бұл болашақта құқық бұзушылықтардың алдын алу үшін маңызды.
Алайда, алдын алу шараларына қарамастан, ата-аналар балаларын тәрбиелеу және олардың құқықтарын қорғау міндеттерін тиісінше орындамай келеді. Осы жылдың өзінде 750 заңды өкіл тәрбие мен білім беру, құқықтар мен мүдделерді қорғау жөніндегі міндеттерін орындамағаны үшін жауапқа тартылды. Полиция қызметкерлері 409 берекесіз отбасын анықтап, профилактикалық есепке қойды.
Соңғы демалыс күндері павлодарлық полицейлер берекесіз отбасылар бойынша кезекті рейд өткізді. Бұл рейдтің мақсаты – отбасылық қатынастардағы құқық бұзушылықтардың алдын алу, олардың себептері мен жағдайларын анықтау, сондай-ақ бұзушылық жасаушыларға құқықтық әсер ету. Тұрғылықты жері бойынша ІІО есебінде тұрған және тұрмыста құқық бұзушылық жасауға бейім адамдар, сондай-ақ балаларды тәрбиелеу жауапкершілігінен жалтарған, спирттік ішімдіктерді теріс пайдаланатын отбасылар тексерілді.
«Заң және тәртіп» қағидасы тек заңды қолдануды ғана емес, сонымен қатар отбасындағы жағдайды түзету үшін әлеуметтік көмек пен оңалту механизмін де қажет етеді. Бұл тек жазалау ғана емес, сондай-ақ бұзушылықтарды түзету мүмкіндігін де береді.
Ювеналдық полиция қызметкерлері осындай отбасылармен профилактикалық шаралар өткізіп, олардың жағдайын жақсартуға және түзетуге бағытталған жұмыстар жүргізеді.
Егер сізде қиын жағдайдағы отбасылар, балаларды дұрыс тәрбиелемейтін немесе қатыгездік пен зорлық-зомбылыққа ұшыраған отбасылар туралы ақпарат болса 102 телефонына қоңырау шалыңыз немесе «Police 102» мобильді қосымшасын пайдаланыңыз. Анонимділікке кепілдік беріледі.
