Түркістан облысында патрульдік полицейлер жолда қалған жүргізушілерге көмектесті, — деп хабарлайды Polisia.kz.
Патрульдік полиция инспекторлары республикалық маңызы бар трассаларда жол қауіпсіздігін қамтамасыз ету мақсатында рейдтік-профилактикалық іс-шара өткізді. Бұл шарада тәртіп сақшылары жол қозғалысын реттеп қана қоймай, бірқатар жүргізушіге көмек берді.
Мәселен, батальон қызметкерлері Шымкент — Самара республикалық маңызы бар тасжолының 23 шақырымында тоқтап тұрған ВАЗ автокөлігін байқады. Бірден көлікке барып, жүргізушіден не жағдай болғанын сұрастырды.
Анықталғандай, жүргізуші Бәйдібек ауданынан Шымкент қаласына бара жатқан. Кенет жанар-жағармайы таусылып, жол жиегіне шығып тұрған. Осы жайт бойынша инспекторлар жанар-жағармай беріп, жүргізушінің сапарын ары қарай жалғастыруға септігін тигізді.
Одан бөлек полицейлер жол бойынан Hyundai Tucson автокөлігіне тиесілі мемлекеттік тіркеу нөмерін тауып алды. Содан планшет арқылы бірден иесін анықтап, жеткізіп берді.
Келесі жағдайда Hyundai шетел автокөлігі алдыңғы дөңгелегінің желі шығып, тоқтап тұрған. Ал инспекторлар автокөлікке қосалқы дөңгелегін ауыстыруға жәрдем берді.
Жолда қалған жүргізушілер қолынан келгенше көмектескен полицейлердің әрекетіне риза болып, алғыстарын жеткізді.
