Павлодарлық оқушылар жол қозғалысы ережелері мен қауіпсіздік дағдыларын паш етті, - деп хабарлайды Polisia.kz.
Щербакты ауданында жас жол инспекторларының (ЖЖИ) қатысуымен өткен байқау – жол қозғалысы ережелерін сақтау мәдениетін қалыптастыруға бағытталған тағылымды шара болды. Аудандық білім беру мекемелерінің оқушылары қатысқан бұл байқауды аудандық полиция бөлімі ұйымдастырып, қызметкерлер қазылар алқасы мен тәлімгерлік рөлін атқарды.
Іс-шара аясында қатысушылар жол қозғалысы қауіпсіздігіне қатысты теориялық білімдерін, алғашқы медициналық көмек көрсету бойынша тәжірибелік дағдыларын және арнайы жабдықталған алаңда жол белгілері мен таңбалары бар велосипедпен фигуралы жүру шеберліктерін көрсетті. Сонымен қатар командалар жолда қауіпсіз жүріс-тұрысты насихаттайтын шығармашылық қойылымдарын ұсынды.
Полиция қызметкерлері жас инспекторлардың жоғары деңгейдегі дайындығын ерекше атап өтті. Олардың айтуынша, мұндай байқаулар жас буынның тәртіп пен жауапкершілікке бейімделуіне, жол қозғалысына қатысушылар ретінде саналы көзқарас қалыптастыруына үлкен ықпал етеді.
Сайыс қорытындысында үздік шыққан командалар мен қатысушылар грамоталармен және естелік сыйлықтармен марапатталды. Байқауға қатысқан оқушылар тек жағымды эмоциялар алып қана қоймай, болашақта қауіпсіз жол қозғалысына үлес қосатын маңызды тәжірибе жинады.
Бұл игі бастама балалар арасында жолда жүру мәдениетін қалыптастыруға және олардың қауіпсіздігін қамтамасыз етуге бағытталған пәрменді шаралардың бірі ретінде өз нәтижесін беруде.
