Жамбыл облысының оқушылары тәртіп сақшыларының әлеміне саяхат жасады, - деп хабарлайды Polisia.kz.
"Қазақстан балалары – жазды қуанышқа толтырайық!" атты бастама аясында Жамбыл облысында полицейлер мектеп оқушыларына арналған ерекше форматтағы "Мен – полицеймін" атты танымдық квест өткізді.
Іс-шара облыстағы барлық жалпы білім беретін мектептерде 8 бен 15 жас аралығындағы балаларды қамти отырып ұйымдастырылды. Оның негізгі мақсаты – балаларды полиция қызметімен таныстыру, олардың бойында батылдық, әділдік, жауапкершілік пен зейінділік сияқты маңызды қасиеттерді дамыту, сондай-ақ құқық қорғау қызметіне деген құрметті қалыптастыру болды.
Квест барысында қатысушылар түрлі тапсырмалар орындады: ребустар шешіп, қылмыстық оқиғаны әшкерелеуге тырысқан тергеушілер рөлін ойнап көрді, полицияның арнайы құрал-жабдықтарымен танысты, спорттық жарыстарға қатысты. Балалар шығармашылықпен ойлап, өз білімдері мен ептіліктерін көрсетті.
Бұл шара ойын арқылы маңызды ақпаратты жеткізу тәсілінің сәтті үлгісі болды. Кішкентай қатысушылар нағыз полицейлер секілді әрекет етіп, өздерін құқық қорғау саласының бір бөлшегі ретінде сезінді.
Мұндай бастамалар балалардың құқықтық санасын арттырып қана қоймай, олардың бойында отансүйгіштік пен заңға деген құрметті тәрбиелеуге де үлкен ықпал етеді.
