Қонаев қаласында “Нашақорлықсыз өмір – мықтылардың таңдауы!” атты есірткіге қарсы фестиваль өтті, — деп хабарлайды Polisia.kz.
Аталған шара Бүкіләлемдік нашақорлыққа қарсы күрес күніне және айлық іс-шараның аяқталуына орай ұйымдастырылды. Маңызды әрі жарқын фестиваль мыңдаған тұрғынды қамтыған ауқымды алдын алу науқанының қорытындысы болды.
Облыстық есірткіге қарсы күрес басқармасының қызметкерлері екі мың көрерменнің алдында сөз сөйлеп, фестиваль барысында есірткіге қарсы иммунитет қалыптастыруды мақсат еткен бейнероликтер көрсетілді. Олар, әсіресе, жасөспірімдер мен жастар үшін маңызды.
– Біз тек мәселені айтып қана қоймай, одан шығудың жолдарын көрсетеміз, салауатты өмір салтының құндылықтарын насихаттап, жастардың саналы таңдау жасауына көмектесеміз, – деп атап өтті ұйымдастырушылар.
Фестиваль есірткіге қарсы айлықтың қорытындысы ғана емес, сонымен қатар нашақорлықпен күрес – бүкіл қоғамның міндеті екенін дәлелдеген іс-шара болды. Тек бірлесе әрекет ету арқылы ғана еліміздің болашағын есірткінің жойқын әсерінен қорғауға болады.
