Елордалық тұрғын алаяқтарға алданды, - деп хабарлайды Polisia.kz.
Астана қаласы полиция департаменті азаматтарды жаңа интернет-алаяқтық сызбасының таралуы туралы ескертеді. Алаяқ танымал мессенджерлер мен қосымшаларда интернет арқылы "оңай табыс табу" жөнінде жалған хабарландырулар орналастырады. Негізгі шарт – SIM-карталарды сатып алып, оларды "жалға беру". Бұл үшін күнделікті төлем уәде етіледі.
Жасөспірім аталған хабарландыруға сеніп, алаяқтардың WhatsApp мессенджері арқылы берген нұсқауларына сай қазақстандық операторлардың SIM-карталарын тіркеп, оларға байланыстырылған құрылғылар функциясы арқылы қашықтан қол жеткізу мүмкіндігін берген. Бұл алаяқтарға мессенджерді өз пайдасына пайдалануға жол ашқан.
Тексеру барысында жасөспірімнен шамамен 20 SIM-карта тәркіленді. Аталған факті бойынша оның ата-анасы бала тәрбиелеу жөніндегі міндеттерін орындамағаны үшін жауапқа тартылды.
Полиция ескертеді: SIM-карталарды және жеке деректерді үшінші тұлғаларға беру қылмыстық схемаларда пайдаланылуы мүмкін. Мұндай әрекеттер үшін әкімшілік те, қылмыстық та жауапкершілік қарастырылған.
