Ақтау қалалық полиция басқармасында "Бақытты отбасы – бақытты ел" тақырыбында пресс-конференция ұйымдастырылды. Іс-шара 27 тамыз бен 10 қыркүйек аралығында республика көлемінде өткізіліп жатқан акция аясында ұйымдастырылды, – деп хабарлайды Polisia.kz.
Пресс-конференцияның негізгі мақсаты – отбасындағы тұрмыстық зорлық-зомбылықтың алдын алу, болдырмау, әрбір жанұя мүшесінің қауіпсіздігін қамтамасыз ету және қоғамда отбасы құндылықтарын насихаттау.
Шара барысында сөз сөйлеген қатысушылардың айтуынша, бақытты отбасы – өзара сыйластыққа, сүйіспеншілікке, түсіністік пен қамқорлыққа негізделген шағын мемлекет. Мұндай ортада бала өзін қауіпсіз әрі маңызды тұлға ретінде сезінеді. Осындай берекелі отбасыдан шыққан ұрпақ ертеңгі қоғамға жауапты азамат болып қалыптасады.
- Зорлық – тәрбиенің орнына жүретін амал емес. Зорлыққа жол жоқ қоғамда ғана бала еркін ойлап, ертеңіне сеніммен қарайды, – деп атап өтті спикерлер.
Шараға Ақтау қаласы прокурорының орынбасары, денсаулық сақтау және әлеуметтік сала өкілдері, "Аналар кеңесі" мен "Жанұя" орталығының жетекшілері, үкіметтік емес ұйымдардың басшылары, заңгерлер, психологтар, сондай-ақ Ақтау қалалық полиция басқармасының қызметкерлері қатысты.
Акция барысында қоғам назарын отбасылық құндылықтарға аударуға бағытталған бірқатар шара өткізіледі:
•пресс-конференциялар мен ақпараттық кездесулер;
•флешмобтар, мобильді акциялар;
•көпбалалы отбасылармен, полиция әулеттерімен кездесулер;
•ұйымдар мен оқу орындарында семинарлар, дөңгелек үстелдер;
•тұрмыстық зорлық-зомбылық профилактикасына арналған жадынамалар мен әлеуметтік плакаттарды тарату;
•қолайсыз отбасыларға рейдтер;
• "111" бірыңғай сенім телефонының жұмысын кеңінен таныстыру.
