Қазақстан Республикасы Конституциясының 30 жылдығына орай 100-ден астам көлік полицейі марапатталды, - деп хабарлайды Polisia.kz.
Көліктегі полиция департаментінде Қазақстан Республикасы Конституциясының 30 жылдығына арналған салтанатты жиын өтті. Іс-шараға департамент басшылығы мен жеке құрамы, сондай-ақ ішкі істер органдарының ардагерлері қатысты.
Мерекелік шара Қазақстан Республикасының Мемлекеттік Гимнін орындаумен басталды көліктегі полиция департаментінің бастығы Айдос Рысбаев жиналғандарға арнаған құттықтау сөзінде Конституцияның тәуелсіз Қазақстанның қалыптасуындағы тарихи рөліне тоқталып, заңдылық пен қоғамдық тәртіпті қамтамасыз етудегі ішкі істер органдарының маңызды миссиясын атап өтті.
Сондай-ақ ол жас ұрпақты патриоттық рухта тәрбиелеуге және қызметтің үздік дәстүрлерін насихаттап, тәжірибесімен бөлісіп жүрген ардагерлерге алғысын білдірді. Айдос Рысбаев барша қызметкерлерді ел Тәуелсіздігінің басты нышаны саналатын мерекемен құттықтап, мықты денсаулық, отбасы амандығы және Отан игілігі жолындағы адал қызметте табыс тіледі.
Мерекеге орай қызметтік міндетін адал атқарып жүрген бірқатар полиция қызметкеріне ведомстволық марапаттар табысталды. Оның ішінде "Ішкі істер органдарының үздігі" төсбелгісі мен "Құқық тәртібін қамтамасыз етуге қосқан үлесі үшін" медалі бар. Бұған қоса, 101 үздік қызметкер мен ішкі істер органдарының ардагерлері Қазақстан Республикасы ІІМ мен көліктегі ПД-нің Құрмет грамоталары және алғысхаттарымен марапатталды.
Салтанатты жиын соңында департамент қызметкерлерінің күшімен дайындалған мерекелік концерт қойылды.
