Абай облысының полицейі республикалық виртуалды сұлулық байқауында жеңімпаз атанды, - деп хабарлайды Polisia.kz.
Абай облысы полиция департаменті Семей қалалық полиция басқармасының әкімшілік полиция бөліміндегі әкімшілік тәжірибе тобының технигі, полиция аға сержанты Гүлім Төлепбаева республикалық деңгейде өткен виртуалды сұлулық байқауында жеңіске жетіп, ішкі істер органдарындағы нәзік жандылардың мәртебесін тағы бір мәрте асқақтатты.
Бұл байқаудағы басты мақсат – сұлулықты дәріптеу ғана емес, полиция қатарындағы әйел қызметкерлердің жан-жақтылығын, парасаттылығын және азаматтық ұстанымын паш ету болды. Қатысушылар өз фотосуреттері мен қысқаша өмірбаяндарын онлайн форматта ұсынды, ал жеңімпазды көпшілік ашық дауыс беру арқылы анықтады. Байқау нәтижесінде Гүлім Айболатқызы көпшіліктің зор қолдауына ие болып, үздік деп танылды.
Гүлім Төлепбаева ішкі істер органдарында бірнеше жылдан бері еңбек етіп келеді. Ол – өз ісіне адал, жауапкершілігі жоғары, әріптестері арасында сыйлы маман. Қызметтік міндеттерін мінсіз атқарып қана қоймай, қоғамдық шараларға да белсене араласады. Бос уақытында шығармашылықпен айналысып, өзін жан-жақты дамытуға көңіл бөледі.
Бұл жетістік – полиция қызметкерлерінің кәсіби қызметтен бөлек, мәдени және шығармашылық бағыттарда да белсенді екенін көрсететін айқын дәлел. Гүлім Айболатқызының жеңісі әріптестеріне, әсіресе жас мамандарға үлкен үлгі болып отыр.
Айта кету керек, бұған дейін Гүлімнің фотосуреті облыстық музейлердің бірінде ұйымдастырылған фотокөрмеге қойылып, көпшіліктің назарын аударған болатын. Бұл оның азаматтық ұстанымы мен қоғамдағы белсенділігінің тағы бір айғағы.
Осындай жетістіктер полиция қызметкерлерінің оң имиджін қалыптастырып қана қоймай, олардың адами және рухани келбетін ашуға зор үлес қосады. Гүлім Айболатқызына алдағы уақытта да шығармашылық табыс пен қызметтік биік белестер тілейміз!
