Жетісуда Конституцияның 30 жылдығына арналған салтанатты жиын өтті, - деп хабарлайды Polisia.kz.
Жетісу облысында 1995 жылдың 30 тамызында бүкілхалықтық референдумда қабылданған Қазақстан Республикасының Конституциясының 30 жылдығына арналған салтанатты жиын өтті. Мерекелік іс-шараға полиция департаментінің басшылығы, ішкі істер органдары мен Ұлттық ұланның ардагерлері, сондай-ақ жеке құрам қатысты.
Жиында полиция департаментінің бастығы Сарқытбай Құсаинов құттықтау сөз сөйлеп, елдің Негізгі заңының тарихи және саяси маңызын ерекше атап өтті. Оның айтуынша, Конституция – тәуелсіздіктің берік тұғыры, заңдылық пен қоғамдық тәртіптің басты кепілі. Сонымен қатар әріптестерін департамент басшысының орынбасарлары мен құрметті ардагерлер де құттықтап, жылы лебіздерін білдірді.
Шараның ең әсерлі сәттерінің бірі – туды салтанатты шығару рәсімі болды. Барабан үнімен сап түзеген арнайы топ Қазақстан Республикасының Мемлекеттік Туы мен ҚР ІІМ Жауынгерлік Туын алаңға алып шықты. Біртұтас рухпен жеке құрам Мемлекеттік Әнұранды шырқап, одан кейін үздік полиция қызметкерлерін марапаттау рәсімі өтті.
Қоғамдық қауіпсіздікті қамтамасыз етуге зор үлес қосып, кәсіби шеберлігі мен адалдығын көрсеткен тәртіп сақшылары ведомстволық марапаттарға ие болды. Департамент басшылығы әр қызметкердің еңбегі – халықтың тыныштығы мен сенімін нығайтуға қосылған баға жетпес үлес екенін атап өтті.
Бұл мерейтойлық мереке тағы бір мәрте дәлелдеді: Қазақстан Конституциясы – қоғамдағы бейбітшілік пен тұрақтылықтың берік кепілі, ал заңға адалдық – халықтың полицияға деген сенімінің негізі.
