СҚО-да Конституция күніне орай спорттық-бұқаралық іс-шаралар ұйымдастырды, - деп хабарлайды Polisia.kz.
Солтүстік Қазақстан облысында полицейлер Қазақстан Республикасы Конституциясының 30 жылдық мерейтойына орай спорттық-бұқаралық іс-шаралар ұйымдастырды. Оған өңірдің жас спортшылары белсене қатысты.
Ең кішкентай футбол үйірмесіне қатысушы балалар үшін тәртіп сақшылары "Динамо" дене шынықтыру-спорт қоғамымен бірлесіп қызықты эстафета өткізді. Қаппен жүгіру, картоппен жарысу және басқа да көңілді тапсырмалар болашақ футболшыларға көтеріңкі көңіл күй сыйлады. Барлық қатысушылар тәтті сыйлықтарға ие болса, жеңімпаздарға "Динамо" логотипі бейнеленген бас киімдер табысталды.
Жасөспірімдерді полицейлер Орталық саябақта өткен екі шақырымдық жүгіруге шақырды. Жедел уәкілдер, тергеушілер және басқа да қызмет өкілдері Қазақстан мен "Динамо" қоғамының жалауларын ұстап, қашықтықты еңсерді. Ұйымдастырушылар - облыстық полиция департаментінің арнайы және кәсіби даярлық басқармасының қызметкерлері мен "Динамо" басшылығы - қатысушыларды мемлекеттік мерекемен құттықтап, Ата заң әрбір азаматтың қорғалуын және өзін-өзі дамыту мүмкіндіктерін қамтамасыз ететінін еске салды.
Мереке қарсаңында "Динамо" спорт кешенінде мини-футболдан турнир де өтті. Оған облыстық полиция департаментінің басшылығы, жеке құрамы және ардагерлері қатысты. Командалық рухты тәрбиелеу мен салауатты бәсекелестік - мұндай іс-шаралардың басты мақсаты. Конституция күніне арналған спорттық жарыстар еліміздің бірлігін тағы да айқындап, полиция мен қоғам арасындағы байланыс пен ұрпақтар сабақтастығын көрсетті.
