Оралда Конституцияның 30 жылдығына арналған салтанатты шара ұйымдастырылды, - деп хабарлайды Polisia.kz.
Қазақстан Республикасы Конституциясы күні қарсаңында Орал қаласындағы Жеңіс алаңында мерекелік іс-шара ұйымдастырылды. Шараға Батыс Қазақстан облысының ішкі істер органдарының қызметкерлері, БҚО ПД Қоғамдық кеңесінің мүшелері мен ардагерлер қатысты.
Салтанатты жиында Батыс Қазақстан облысының әкімі Нариман Төреғалиев құттықтау сөз сөйлеп, қызметінде ерекшеленген полицейлерге алғыс хаттар мен грамоталар табыстады.
Сонымен қатар БҚО полиция департаментінің бастығы Арман Оразалиев Қазақстан Республикасы Ішкі істер министрінің атынан төсбелгілер, алғыс хаттар мен грамоталарды тапсырды. Бірқатар қызметкер департамент бастығының бұйрығымен де марапатталды.
Мерекелік шара барысында аудандық полиция бөлімдеріне 30 жаңа қызметтік автокөліктің кілті берілді. Ал жас полиция қызметкерлері әріптестерінің алдында салтанатты түрде Отанға және халыққа адал қызмет етуге ант қабылдады.
Іс-шара Орал гарнизоны полициясының саптық шеруімен аяқталды. Ресми бөлімнен кейін тәртіп сақшылары қайтадан қоғамдық тәртіп пен азаматтардың қауіпсіздігін қамтамасыз ету қызметіне кірісті.
