Қарағандыда Конституция күніне орай облыстық патриоттар форумы өтті, — деп хабарлайды Polisia.kz.
Қарағанды қаласындағы Майқұдық саябағында Конституция күніне орай “Ата Заңға 30 жыл: Тәуелсіз мемлекеттің берік тұғыры” атты ауқымды облыстық патриоттар форумы ұйымдастырылды.
Іс-шараға Қарағанды облысының әкімі Ермағанбет Бөлекпаев қатысып, жиналғандарды еліміздің басты мерекелерінің бірі – Конституция күнімен құттықтады.
Өз сөзінде өңір басшысы Конституцияның тәуелсіздіктің берік іргетасы, әрбір азаматтың құқықтары мен бостандықтарының кепілі екенін атап өтті. Сондай-ақ ел дамуы заңдылықты сақтау, құқықтық тәртіп пен тұрақтылық қағидаттарына тікелей байланысты екендігін жеткізді.
– Құрметті қарағандылықтар, Конституцияның 30 жылдығы – әрбір қазақстандық үшін айтулы мереке. Бұл заң бізді қорғайды, ертеңгі күнге сенім сыйлайды және жаңа жетістіктерге жол ашады. Конституцияның басты құндылығы – адам, оның құқықтары мен бостандықтары. Елдегі бейбітшілік пен тұрақтылықтың негізіне айналған Ата Заңымыз біздің қоғамдағы заң мен тәртіптің басымдығын айқындап берді. Президентіміз атап өткендей, Конституцияның мызғымас құндылықтарына сүйене отырып, біз әділ Қазақстанды – баршаға тең мүмкіндік мемлекеті етіп құрамыз, – деді Ермағанбет Бөлекпаев.
Форум аясында облыс әкімі елдің өркендеуіне елеулі үлес қосып жүрген бірқатар сала өкілдерін марапаттады. Олардың қатарында Қарағанды облысы полиция департаментінің қызметкерлері – учаскелік полиция инспекторлары Дархан Жаңабылов пен Серіжан Жандосұлы бар.
Дархан Жаңабылов Нұра аудандық полиция бөлімінде 15 жылдан астам қызмет етіп келеді. Ол биыл “Үздік маман” республикалық байқауында ауылдық учаскелік полиция инспекторлары арасында үздік деп танылды.
– Мен полиция қызметінде әулет дәстүрін жалғастырып келемін. Әкімшілік учаскемде бір жарым мыңға жуық тұрғын бар, олардың тыныштығы үшін аянбай еңбек ету – менің басты міндетім. Байқауда тұрғындар сенім білдіріп, дауыс бергені – үлкен мәртебе, – деді Дархан Жаңабылов.
Ал Серіжан Жандосұлы – Жаңаарқа ауданы Түгіскен ауылының тумасы, ІІМ-нің Б.Бейсенов атындағы Қарағанды академиясының түлегі. 2020 жылдан бері учаскелік инспектор қызметінде. Қазіргі таңда Қарағанды қаласы Оңтүстік-Шығыс полиция бөлімінде жұмыс істейді.
– Конституция күні облыс әкімінен марапат алу – үлкен құрмет. Заң мен тәртіпті сақтап, қоғам тыныштығын қамтамасыз ету жолында бар күшімді аямай еңбек етемін. Барша қазақстандықтарды мерекемен құттықтаймын, – деді марапат иегері.
Салтанатты шара барысында тұрғындар мен қала қонақтары үшін саябақ аумағында тегін құқықтық кеңестер жәрмеңкесі өткізілді. Полиция қызметкерлері азаматтарға есірткі қылмысының, интернет-алаяқтықтың алдын алу және көші-қон заңнамаларын сақтау бойынша ақпараттық түсіндіру жұмыстарын жүргізді.
