Астанада оқушылар арасында веложарыс ұйымдастырылды, — деп хабарлайды Polisia.kz.
Елордада полиция мен прокуратураның үйлестіруімен ұйымдастырылған есірткі қылмысына қарсы 30 күндік іс-шаралар кешені жалғасуда. Оның маңызды бөлігі – астаналық полиция мен қала әкімдігі бірлесіп өткізген оқушылар арасындағы веложарыс болды.
Іс-шараның басты мақсаты – өскелең ұрпақтың есірткіге деген қарсы пікірін қалыптастыру, жастар мен олардың ата-аналарының назарын есірткі қылмысы проблемасына аудару, сондай-ақ салауатты әрі белсенді өмір салтын насихаттау.
Жарысқа елордалық мектеп оқушылары қатысып, әртүрлі жас санатында бақ сынасты. Олар 9 шақырымдық қашықтықты еңсерді. Жарыс қорытындысы бойынша жеңімпаздар естелік сыйлықтармен және дипломдармен марапатталды, ал барлық қатысушылар жағымды әсерлер мен спортпен шұғылдануға қосымша ынта алды.
“Астана – есірткісіз қала” ұранымен өткен шара спорт пен қоғам мен мемлекеттік органдардың бірлескен бастамалары жастарды есірткі тұтыну мен таратуға тартудың алдын алуда айқын үлгі болды.
Мұндай профилактикалық жобалар жас ұрпақты қорғауда маңызды рөл атқарып, балаларға дұрыс құндылықтарды қалыптастырып, салауатты таңдау жасаудың маңызын түсіндіреді.
