ІІМ-де "Жеке детективтік қызмет туралы" ҚР Заң жобасына арналған қоғамдық тыңдау өтті.
Іс-шараға Ішкі істер министрінің орынбасары Санжар Әділов төрағалық етті, – деп хабарлайды Polisia.kz.
Қоғамдық тыңдауға Мәжіліс депутаты Абзал Құспан, құқықтанушы ғалымдар, Бас прокуратура, Қаржы мониторингі агенттігі, Әділет министрлігі, "Атамекен" ҰКП, "ІІМ қылмыстық іздестіру ардагерлерінің кеңесі" және "Қалқан – қауіпсіздік сарапшылары мен детективтер" қоғамдық бірлестігінің өкілдері қатысты.
Аталған заң жобасын Парламент Мәжілісінің депутаттары әзірлеген. Тыңдау барысында құжаттың негізгі ережелері талқыланып, жеке детективтік қызметтің құқықтық негіздерін қалыптастыру мәселелері қарастырылды.
Заң жобасының негізгі мақсаты – жеке детективтердің қызметін құқықтық негізде бекіту, азаматтардың өз құқықтарын қорғау мүмкіндіктерін кеңейту.
Бұл адамдарға қандай пайда әкеледі:
Біріншіден, азаматтар сотта, қылмыстық және әкімшілік істерде өз мүдделерін қорғау үшін ақпарат жинауда білікті көмек ала алады.
Екіншіден, детективтерді міндетті түрде лицензиялау енгізіледі. Бұл дайындықсыз және жауапкершіліксіз "ақпарат жинаумен" айналысатын жағдайлардың алдын алады. Тек лицензияланған маман ғана осындай қызметтерді көрсете алады.
Үшіншіден, детективтер өз қызметін сақтандыруға міндетті болады. Бұл заңсыз әрекеттердің салдарына төтеп беруді қамтамасыз етеді.
Төртіншіден, заң қатаң мемлекеттік бақылауды көздейді. Азаматтар детективтің әрекеттеріне мемлекеттік органдарға шағымдану құқығын алады.
Яғни заң жобасы мыналарға бағытталған:
- мамандықтың өркениетті шеңберін енгізу;
- азаматтардың мүдделерін қорғау;
- жеке өмірге рұқсатсыз араласудың алдын алу;
- құқықтарды қорғаудың заңды жолдарына сенімділікті арттыру.
Дөңгелек үстелге қатысушылар түзетулерді қолдады.
