Қостанай облысында сотталғандар еңбек нарығына қажетті мамандықтарды меңгеріп жатыр, - деп хабарлайды Polisia.kz.
Қостанай облысы бойынша қылмыстық-атқару жүйесі департаментінің мекемелерінде сотталғандарды еңбекке баулу және қайта әлеуметтендіру бағытында жүйелі жұмыстар жүргізілуде. Бұл бастамалардың басты мақсаты – жазасын өтеп жатқан азаматтарға жаңа өмірге бейімделуіне, қоғамға оралуына және бостандыққа шыққаннан кейін өз бетінше еңбек етуіне мүмкіндік жасау.
Бүгінгі таңда департаментке қарасты түзеу мекемелерінде 47 сотталған арнайы техникалық колледжде кәсіби білім алып жатыр. Оның ішінде:
15 адам – автомобиль жөндеу слесарі,
17 адам – кең бейінді құрылысшы-монтажшы,
15 адам – киім тігу және үлгілеу мамандықтары бойынша оқуда.
Сабақтар тәжірибелі оқытушылардың жетекшілігімен өтіп, теориялық және тәжірибелік кезеңдерден тұрады. Мұндай тәсіл сотталғандарға нақты өндірістік дағдыларды меңгеруге мүмкіндік береді. Оқу аяқталған соң тыңдаушыларға мемлекеттік үлгідегі диплом табысталып, ол олардың болашақта жұмысқа орналасуына жол ашады.
ҚАЖ департаментінің өкілдері кәсіби білім беру — сотталғандарды түзетудің және олардың қайта қылмысқа бармауының маңызды тетігі екенін атап өтеді.
- Сотталғандарға кәсіптік білім беру – олардың болашағына жасалған инвестиция. Қазіргі таңда көптеген түзеу мекемелерінде тігін, ағаш және металл өңдеу, құрылыс пен автомеханика бағыттары бойынша тұрақты курстар ұйымдастырылған, – дейді Қостанай облысы бойынша ҚАЖ департаментінің өкілі.
Сонымен қатар түзеу мекемелерінде өндірістік цехтар жұмыс істейді. Онда сотталғандар өз мамандығы бойынша тәжірибе жинақтап, еңбекақы алады. Бұл олардың әлеуметтік жауапкершілігін арттырып, қоғамға бейімделу процесін жеңілдетеді.
Қостанай облысы бойынша ҚАЖ департаменті алдағы уақытта да жазасын өтеушілерге сұранысқа ие жаңа кәсіп түрлерін үйретуді жалғастыруды жоспарлап отыр.
