Павлодар облысында "Жас сақшы" полиция сыныбының оқушылары саптық қараудан өтті, - деп хабарлайды Polisia.kz.
Павлодар облысының Тереңкөл ауданына қарасты Песчаное ауылындағы мектепте полиция қызметкерлері "Жас сақшы" полицейлік сыныбының оқушыларына жол қауіпсіздігі тақырыбында сабақ өткізіп, саптық қарау ұйымдастырды. Іс-шараға оқу орнының шамамен отыз жас кадеті қатысты.
Аудандық полиция бөлімінің бастығының орынбасары Асхат Ойратұлы жас сақшыларға жол қозғалысы ережелерін қатаң сақтаудың маңызын түсіндіріп, жол белгілері мен реттеуші сигналдарының мәнін баяндады. Ол жаяу жүргіншілердің тек белгіленген өткелдер арқылы өтуі, бағдаршам талаптарын орындауы және жол қозғалысы мәдениетін сақтау қажеттігін атап өтті. Сабақ барысында жолда туындайтын түрлі жағдайлар талданып, жаяу жүргіншілер мен жүргізушілердің қауіпсіз жүріс-тұрысы жөнінде пікір алмасты.
Құқық қорғау органы өкілі жол ережелерін білу апаттық жағдайлардың алдын алып, адам өмірін сақтауға мүмкіндік беретінін айтты. Сондай-ақ оқушыларды алған білімдерімен өз қатарластары арасында бөлісіп, қауіпсіздік мәдениетін қалыптастыруға үлес қосуға шақырды.
Сабақтан кейін полицейлер саптық қарау өткізді. Онда кадеттердің сыртқы келбеті, саптағы тәртібі, бұйрықтарды нақты орындауы және саптық жүріс қадамы тексерілді. Әрбір жас сақшы өз дайындық деңгейін "өте жақсы" бағасына сай көрсетуге тырысты.
Ведомствоның хабарлауынша, "Жас сақшы" — құқық қорғау органдарында болашақ мансапқа бағытталған арнайы сынып. Бағдарлама дәстүрлі пәндермен қатар құқық негіздерін, криминалистика элементтерін, полиция қызметінің ерекшеліктерін, дене шынықтыру және өзін-өзі қорғау дағдыларын тереңдетіп оқытуды қамтиды.
Полиция қызметкерлерінің айтуынша, мұндай бастамалар құқық қорғау органдары мен өскелең ұрпақ арасындағы сенімді көпірге айналып келеді. Бұл сыныптар жас буынның жауапкершілігін, азаматтық ұстанымын және қоғамға қызмет етуге деген ынтасын қалыптастыруға ықпал етеді. "Жас сақшы" – тек тәрбиелік жоба ғана емес, елдің құқық қорғау жүйесінің болашақ кадрлық әлеуетін қалыптастыратын маңызды бастама.
