Семейде полицейлер "Жас сақшы" сыныбына футболдан жарыс өткізді, – деп хабарлайды Polisia.kz.
Абай облысы полиция департаменті Семей қаласындағы №40 орта мектептің Жас сақшы сыныбына ұмытылмас сый жасады. “Динамо” спорт кешенінде өткен бұл күн оқушылар үшін тек дене шынықтыру ғана емес, шынайы спорт рухының, командалық бірліктің, жігер мен төзімділіктің мерекесіне айналды.
Іс-шара қарқынды бой сергіту жаттығуларынан басталды. Кәсіби нұсқаушылардың жетекшілігімен балалар денені қыздырып, икемділікті арттыратын, қуатты оятатын түрлі жаттығулар орындады. Әр қимыл – сергектік, әр қадам – ынта, әр жүзден байқалған қуаныш — жас сақшылардың спортқа деген шынайы қызығушылығын аңғартты.
Бой сергіту сәтінен кейін көптен күткен футбол ойыны басталды. Жас сақшылар екі командаға бөлініп, алаңда нағыз шеберліктерін көрсетіп бақты. Жылдам қимыл, шалт шешім, тапқыр пастар мен нық соққылар — бәрі де ойынның қызуын арттыра түсті.
Командалар жеңіске жетуге барын салғанымен, бір-бірін қолдауы, өзара құрметі, ұйымшылдығы әр сәтте сезіліп тұрды. Дәл осы қасиеттер ойынның басты құндылығына айналды.
Турнир соңында барлық қатысушыларға алғыс білдірілді. Бұл күн жас сақшылардың бойындағы спортқа деген қызығушылықты оятып қана қоймай, оларды бірлікке, жауапкершілікке және сыйластыққа тәрбиелеген әсерлі шара болды.
Және ең бастысы — сайыста достық жеңді. Өйткені жеңіс ол – тек есепте емес, жүректердің бірлігінде, ойынның шынайы рухында, бірге өткен жарқын сәттердің бағасында.
