Түркістанда қоғамдық қауіпсіздік үшін бет-жүзді жабуға қойылған шектеулер түсіндірілді, – деп хабарлайды Polisia.kz.
"Заң мен тәртіп" қағидатын ілгерілету шеңберінде Түркістан облысы полиция департаментінің экстремизмге қарсы іс-қимыл басқармасының қызметкерлері учаскелік полиция инспекторларымен бірлесіп, қоғамдық орындарда бетін толығымен жабатын киім-кешек пен аксессуарларды киюге тыйым салуды көздейтін заңнамадағы өзгерістер бойынша халық арасында ақпараттық түсіндіру жұмыстарын жалғастыруда.
Өткізілетін іс-шаралар барысында тәртіп сақшылары адамдар көп жиналатын орындарға және орталық көшелерге шықты. Онда тұрғындарды қоғамдық қауіпсіздікті арттыру және қажет болған жағдайларда жеке басын уақтылы сәйкестендіру мүмкіндігін қамтамасыз етуге бағытталған нормалардың мақсаттары туралы хабардар етті.
Полицейлер адамның визуалды сәйкестендірілуіне кедергі келтіретін заттар: балаклавалар, никабтар, маскалар және бетті жабатын басқа керек-жарақтарға шектеу қойылғанын атап өтті. Бұл ретте бетін жаппайтын діни киім-хиджаб, химар, шейла, әл-амира және басқалары — нормаға бағынбайды.
Сонымен қатар тыйым ауа-райына, медициналық көрсеткіштерге, заңнама талаптарын орындауға, қызметтік міндеттерге, азаматтық қорғау саласындағы қызметке, сондай-ақ спорттық және мәдени-бұқаралық іс-шараларға қатысуға байланысты жағдайларға қолданылмайды.
Полиция жаңа нормалар діни бостандыққа әсер етпейтінін және азаматтардың конституциялық құқықтарын бұзбайтынын, өйткені олар тек қоғамдық қауіпсіздік мәселелеріне қатысты екенін атап өтті.
Тәртіп сақшылары азаматтарды заңнаманы сақтауға және құқықтық тәртіпті қамтамасыз етуге бағытталған жаңа нормаларға түсіністікпен қарауға шақырады.
