Абай облысында полицейлер қашпақ болған мас жүргізушінің жолын кесті, – деп хабарлайды Polisia.kz.
Абай облысының Жаңасемей ауданында қоғамдық тәртіп пен жол қауіпсіздігін қамтамасыз ету барысында учаскелік полиция инспекторлары күдік тудырған ВАЗ автокөлігін байқайды. Көлікті басқарған 39 жастағы жүргізуші полиция қызметкерлерінің тоқтау жөніндегі заңды талабын дер кезінде орындамай, қозғалысын жалғастырған.
Қызметкерлердің байыпты әрі үйлесімді әрекеттерінің арқасында автокөлік тоқтатылып, тексеру жүргізілді. Тексеру барысында жүргізушінің алкогольдік мас күйде болғаны анықталды. Мұндай жағдай жолдағы қауіпсіздікке елеулі қауіп төндіруі мүмкін екені белгілі.
Құқық бұзушыға қатысты әкімшілік шаралар қабылданды. Ол 7 жыл мерзімге көлік жүргізу құқығынан айырылып, 15 тәулікке арнайы қабылдау орнына қамалды. Ал көлік арнайы айыптұраққа қойылды. Полицейлер оның әрекеттері өзге жол қозғалысы қатысушылары үшін қандай қауіп төндіргенін түсінуге жеткілікті уақыт болатынын атап өтті.
Полиция барлық жүргізушілерді жол қозғалысы кезінде аса мұқият болуға шақырады. Кешкі уақытта көлік қозғалысы күшейіп, жаяу жүргіншілер мен балалардың жолда жүруі жиілейді. Осындай сәттерде әрбір сақтық шарасы маңызды.
