Тәулік бойы қала тыныштығын күзеткен тәртіп сақшысының бір күні жайлы Polisia.kz сайтынан оқи отырыңыз.
Бүгін біз полиция қызметкерінің өміріндегі бір қарапайым, бірақ сонымен бірге оңай емес күннің шымылдығын түріп көреміз. Бұл —жауапкершілікке, қажыр-қайратқа және антқа адалдыққа толы күн.
Полиция қызметкері Еділ Дихамбаев ішкі істер органдарындағы қызметін 2018 жылы бастаған. Бүгінде ол Жетісу облысы Полиция департаментінің Алакөл аудандық полиция бөлімінде қызмет атқарып, Үшарал қаласы тұрғындарының қоғамдық тәртібі мен тыныштығын қамтамасыз етуде.
Оның жұмыс күні таңертең ерте — жеке құрамды сапқа тұрғызудан басталады. Қысқа да нұсқа тапсырмалар, дайындықты тексеру, әрі әр қызметкер алда ұзақ сағаттарға созылатын қызмет күтіп тұрғанын жақсы түсінеді. Одан кейін — профилактикалық шаралар, халықпен жүздесу, заң талаптарын түсіндіру, құқықбұзушылықтардың алдын алу. Өйткені полиция — тек оқиғаға әрекет ету ғана емес, қауіптің алдын алып, оны болдырмау.
Аудан көшелерін патрульдеу — аптап ыстықта да, қолайсыз ауа райында да, жұмыс күндері мен мерекелерде де жалғасады. Қала өз тіршілігімен өмір сүріп жатқанда, полицей әрдайым қызмет орнында. Ол ең алдымен алаңдаушылық туған жерде, көмек қажет сәтте, біреудің тағдыры шешілер тұста пайда болады. Көбіне — өз өміріне қауіп төнсе де.
Жұмыс күні қорытынды шығарумен аяқталады. Талдау, есеп, жағдайларды саралау. Алайда ауысым аяқталғанымен, қызмет әрдайым бітпейді — кез келген сәтте дабыл қоңырауы түсуі мүмкін.
— Полициядағы қызмет — кез келгеннің маңдайына жазыла бермейді. Мұнда тек форма кию жеткіліксіз. Патриот болу, ішкі берік ұстанымға ие болу, қоғамдық қауіпсіздікті жеке жайлылықтан жоғары қоя білу қажет. Бұл — заңға қызмет ету, адамдарға қызмет ету, елге қызмет ету.
Бұл — міндет, бірлік, абырой, — деп атап өтті Еділ Дихамбаев.
Еділ Жанатұлы сынды қызметкерлер атақ-даңқ іздемейді. Олар өз борышын адал атқарады. Дәл солардың арқасында біз үйден алаңсыз шығып, балаларымызды көшеге еркін жібере аламыз және тәртіп пен қауіпсіздік сенімді қолда екеніне сенеміз.
