Талдықорғанда полиция қызметкерлері автобус жүргізушілерімен кездесті, – деп хабарлайды Polisia.kz.
Талдықорған қаласы әкімшілік полиция бөлімінің қызметкерлері автобус жүргізушілерімен — жолаушылардың және жол қозғалысына қатысушылардың қауіпсіздігі үшін ерекше жауапкершілік жүктелген азаматтармен маңызды профилактикалық әңгіме өткізді.
Кездесу барысында полиция қызметкерлері қоғамдық көлік жүргізушісі тек салондағы жолаушылардың ғана емес, сондай-ақ автобустан тыс жүрген жаяу жүргіншілер мен басқа да жүргізушілердің өмірі үшін жауапты екенін еске салды. Көп тонналы көлікті басқару кезіндегі кез келген қателік ауыр салдарға әкелуі мүмкін.
Автобустың желіге шығар алдындағы техникалық жағдайын міндетті түрде тексеру, жүргізушінің өз денсаулық жағдайын бақылау, жол қозғалысы ережелерін, маршрут бойынша тоқтау талаптарын, сондай-ақ басып озу мен маневр жасау қағидаларын қатаң сақтау қажеттілігіне ерекше назар аударылды.
— Автобус жүргізушісі — күн сайын ең қымбат құндылықты, яғни адам өмірін сеніп тапсыратын тұлға. Қоғамдық көлікті басқаруда ұсақ-түйек болмайды: әрбір тексеріс, әрбір сақталған ереже ең маңызды талапқа жатады, — деп атап өтті полиция қызметкерлері.
Профилактикалық жұмыс жол-көлік оқиғаларының алдын алуға, жоғары жүргізу мәдениетін қалыптастыруға және жолдағы қауіпсіздік әр жүргізушінің жеке жауапкершілігінен басталатынын еске салуға бағытталған.
